Utvida barnetrygd for fangars barn

BARNEOMBUDET

Barne- og likestillingsdepartementet Postboks 8036 Dep 0030 OSLO

Deres ref:	Vår ref:	Saksbeh:	Arkivkode:	Dato:
	07/00202-2	Kari Jevne	008;O;BO	8.2.2007

Høringssvar: Framlegg om å gi rett til utvida barnetrygd i tilfelle der ektefellen eller sambuaren er i fengsel

Ein viser til høringsnotat datert 16.01.07 vedrørande rett til utvida barnetrygd i dei tilfelle ektefellen eller sambuaren er i fengsel.

Barneombodet skal i høve lov og instruks arbeide for at barns behov, rettar og interesser blir tatt tilbørleg omsyn til på alle samfunnsområda. Ombodet skal særleg følgje med i at lovgjevnad til vern om barn sine interesser blir følgd, og at norsk rett samsvarar med dei plikter Norge har etter FNs konvensjon om barn sine rettar.

FNs barnekonvensjon artikkel 27 slær fast at "Barn har rett til ein levestandard som gir høve til utvikling. Staten skal alt etter dei moglegheiter og ressursar landet har, hjelpe til med klede, mat og ein stad å bu."

Artikkel 27 nr 2 slær fast at det er foreldra som har "det grunnleggjande ansvaret for å sikre, innan sine evner og økonomiske moglegheiter, dei livsføresetnader som er nødvendige for barnet si utvikling."

Artikkel 27 nr 3 gir likevel Staten eit ansvar for å " treffe egna tiltak for å hjelpe foreldre og andre som har ansvaret for barnet til å verkeleggjere denne retten…"

Barneombodet er med utgangspunkt i dette positiv til at det blir iverksett tiltak for å sikre ein betre levestandard, og dermed vonleg betre utviklingsmoglegheiter, for fangars barn. Dette er ei gruppe barn som reelt lever med ein aleineforsørgjar, og som dermed også bør vere tilgodesett med offentlege støtteordningar for aleinefedre.

Barneombodet har følgjande merknader:

3.1 Behovsprøving

Barneombodet er positiv til at rett til utvida barnetrygd bli gitt utan behovsprøving.

3.2 Lengda på fengselsopphaldet

Departementet føreslær at det i høve retten til utvida barnetygd bør liggje eit visst krav når det gjeld lengda på straffa og set grensa til seks månaders fengsel utan vilkår. Dette sett
i samband med kravet om tidsfrist for rett til utvida barnetrygd ved faktisk separasjon og forsvunnen ektefelle. Retten til utvida barnetrygd skal setjast i verk frå det tidspunktet soninga startar.

Barneombodet er positiv til at retten til utvida barnetrygd tek til frå det tidspunktet soninga startar. Ombodet vil likevel be departementet vurdere om kravet for lengda på straffa kan setjast lægre. Sjølv om det er naturleg å samanlikna med kravet om tidsfrist ved faktisk separasjon og forsvunnen ektefelle, er sakene der ein ektefelle eller sambuar er i fengsel annleis på enkelte punkt. Dette er et fråvere av ein ektefelle eller sambuer der ein veit lengda på fråveret på førehand, og som oftast veit ein når fråveret vil ta til. Vidare fører fengselstraff til at ei inntekt i familien fell heilt bort i ein periode som er bestemt på førehand.

Når ein i tillegg veit at barn av fangar har større risiko for å vekse opp i fattigdom enn andre barn, jf. FAFOs levekårsundersøking, meiner Ombodet det er viktig at økonomisk støtte i form av ekstra barnetrygd bør ta til tidlegare enn ved 6 månaders soning utan vilkår. Ombodet ser likevel at det kan vere argument for at ein stiller krav om ei viss lengde når offentlege administrative vedtak skal setjast i verk og føreslær at grensa blir sett til 3 månaders fengsel utan vilkår.

3.3 Andre strafferettslege særreaksjonar

Departementet ber om høringsinstansanes syn på om retten til utvida barnetrygd også skal gjelde andre strafferettslege særreaksjonar som forvaring, påbode psykisk helsevern og påbode omsorg. For økonomien til fangens pårørande er det fråveret av ei inntekt som er avgjerande, ikkje typen strafferettsleg reaksjon. Ombodet meiner difor at andre strafferettslege særreaksjonar bør behandlast på lik line med fengsel utan vilkår.

Ombodet kan ikkje sjå at spørsmålet knytt til varetektsfengsling er drøfta. Ombodet kjenner til tilfelle der fangar har vore fleire månader i varetekt, noko som har dei same økonomiske konsekvensar for fanganes pårørande som ved fengsling. Ombodet ber departementet sjå på korleis denne gruppa skal sikrast i høve retten til utvida barnetrygd.

Med vennleg helsing
Reidar Hjermann
barneombod	Kari Jevne
	seniorrådgjevar

Oppdatert: 30.01.2012 20:56